Spiserikrukker

Besteforeldra mine hadde desse

spiserikrukkene i kjøkenet sitt.

I dag er eg så heldig å ha dei.

Far min har laga hylla dei står på.

Sago, Kaffe, Kardemomme, Kanel

og Pepper

Gryn Potetesmel, Riis

Nelliker, Sennep

Svedsker

Den største krukka er til salt.

Eg synest krukkene er nydelege.
Men dei blir berre til pynt.

Akkurat no senkar roen seg over hytta,
treet er pynta, pinnekjøttet lagt til utvatning,
alt er sjekka om det er på plass.
Barneborna har hengt opp julestrømpene sine.
forventningane stig.

Eg vil ynskje alle mine bloggvenner
God jul !

Ask

I utfordringa til Sanna 

er ordet 

Ask

denne veke.

Box på engelsk.

Sist eg skulle tolke dette ordet

tenkte eg på det norske ordet aske

sjå her

og traff ikkje heilt...

Denne gongen har eg googla meir og

funne ut at det svenske ordet ask kan vere

øskje eller boks på norsk.

I og med at det framleis er vinter og

ein må fyre i omnen for

å halde varmen

har eg valgt å vise bilde frå

 omnskråa.

 Dei to boksene er fylt med

små firkanta tennbriketter.

Boksene er pynta med tova trekk forma som ei ugle,

og strikk i Fanamønster.

Begge trekka har me fått i julegåve tidlegare.

 Slik ser boksa ut utan tekk.

Du er sikkert samd med meg i at det er finare

når den er dekt.

Fyrstikker er sjølvsagt godt å bruke for å få fyr.

Her er nokre av øskjene som ligg

lett tilgjengeleg ved omnen.

Ein annan variant av tennbriketter

er desse:

Avispapir og stearin rulla tett saman.

Desse lika eg best, dei er lette å 

få fyr på vedkubbane med.

Til jul kjøpte me mange øskjer med

slike tennbriketter frå den kommunale bedrifta Herøy Produksjon

og ga vekk i julegåve.

Dugnad som varmar hjartet

Gemsweeklyphotochallenge v. 9 - Ask -

Spegla

Avspeglat

er årets siste ord i utfordringa hos

Sanna.

Ein romjulskveld med spegling i stoveglaset.

Natur på sitt finaste i grannelaget.
(Klikk å bildet)

Eg ynskjer deg gode romjulsdagar.

Og tusen takk til Sanna som gir oss desse
flotte utfordringane.

Gemsweeklyphotochallenge v. 52 - Avspeglat -

Julebakst på hytta

Aniskringler høyrer med til juletradisjonen hos oss.

Eg har ei god gammal oppskrift som

alltid lukkast.

Deiga venta ikkje på bakaren,

den kom og henta oss, he he...

Celina Marie og Leah Sofie

trillar kringler.

Eg laga emner og hadde mi fulle hyre 

med å halde dei med arbeid.

Flinke jenter.

Godt å ha til jul med mange

samla.

Smaksprøve.

Aniskringle med meierismør og brunost er toppers !!

Eplegløgg og kaffi attåt var også godt.

Julegåve

eller Julklapp som er det svenske ordet

er første tema i utfordringa til

Sanna i 2018

Mi aller første julegåve 

fekk eg jula 1949.

Då hadde eg nyleg fylt 1 år

Eg fekk julenissen frå morfar Jon

på Åsen

Nissen har stått framme kvar jul i

snart 70 år.

Eg har alltid prøvt å behandle den med varsemd,

men den ber preg av alder..

 Materialet i nissen er vel ein slags gips

trur eg.

 Eg las i eit ukeblad ein gong om slike nissar,

dei var vanleg å ha som julepynt

midt på 1900 talet.

Gemsweeklyphotochallenge v. 1 - JULKLAPP -

Saragenser

Svigerdatter Renathe ønskte seg 

Saragenser i julegåve.

Ho ville ha raud genser.

Ho innvia den i går då ho reiste heim 

frå hytta til 

ekstraordinært kommunestyremøte i romjula.

Genseren er strikka i 

Faerytale frå Du Store Alpakka.

Opprskrift frå 

Knitting Inna

Mjuk og lett genser,

To av døtrene har fått før,

Leah Sofie

Ella Victoria

Utfordringa

hos Sanna med bloggen

Gemsweeklyphotochallenge

er eit nytt ord kvar veke heile året.

Det har vore spennande og artig å vere med på.

I den siste veka i år 

er ordet SELFIE

Eg føle stor glede og ære over å få 

denne koppen i julegåve

frå barneborna.

Dette er den beste selfie eg kan vise :)

v. 52 -Selfie -

Vangsgutane

Turen på Nordmøre hadde mange

opplevingar.

For mannen min var turen gjennom

Todalen spesiell.

Han sikrar seg juleheftet Vangsgutane kvart år

og var spent på om han kunne finne 

spor etter dei og garden Breiset

sjølv om han veit at alt er oppdikta.

Det var stort for han då han

fann statua over

Steinar og Kåre 

og forfattaren Leif Halse

som står ved skulen.

Steinar Vangen

Kåre Vangen

Leif Halse, forfattaren

Vel heimattkomen har han leita fram

eitt av dei mange julehefta.

Her ser me Larris med hunden Troll, Kåre og Steinar

med mor Sigrid, oksen Peik og katten Mons

Bøker i julegåve

Juleboka til GatemagaZinet i Fredrikstad
var eg så heldig å få av 
Bloggvenninne Inger i mormoruniverset
Mykje fint å lese der.
Tusen takk Inger !


Juleroser
Eit vakkert julehefte, redaktør Herborg Kråkevik,
 inneheld dikt, noveller, kunst og sangtekster
nydeleg fletta saman.
Tusen takk til mi venninne Britt.

Den spennande boka 
Fargene forteller av
 Tove Steinbo
Om fargenes betydning - symbolsk,
psykologisk og estetisk.
Eg må lese og studere og finne ut 
kva "fargesamansetning" eg er
før eg kan ta kartlegginga i heftet som
fyl med boka.


Den innhaldsrike  og fine boka
Vinterfugler
fekk eg tips om i eit innlegg hos
Kleppanrova
og kjøpte boka til mannen min.
Boka skal vere på hytta.


Boka av Anne Holt
I støv og aske
fekk eg av son og svigerdatter
Andrè og Renathe.
Spennande krimroman med
Hanne Wilhelmsen som
hovudfigur.


Edvard Hoem 
Land ingen har sett
er tredje bind i den store krøniken om
Knut Hansen Nesje og slekta hans.
Godt fortalt om menneske i første
del av 1900 talet,
slit og fattigdom,men også gleder.

Sein Hippeastrum

eller kanskje eg skal seie

tidleg, sidan me er
i starten av eit år.

Eg kjøpte fleire knollar tidleg i desember,

nokre tok eg vare på heime

og ga vekk til jul.

Dei to eg skulle ha på hytta i jula

sette eg kjøleg der.

Men stakkarane fekk for kort tid
med vatn og varm stove så dei
 opna seg ikkje før det nye året var på plass.

Hippeastrum, ridderstjerne
er det eigentleg namnet på planten som
i daglegtale blir kalla
 Amaryllis

Namnet  kjem frå det 
greske ordet hippos som tyder hest
og det latinske ordet astrum som tyder stjerne

Ein kan kanskje sjå at blomen
likna på hesteøyre når
 den opnar seg...

Bilde lånt frå Internett

No skal eg nyte synet av dei fine
raude blomane nokre
 dagar til.

GemsofmyLife v. 3: Rød

Å vere fire år i jula

Teksta i songen av Alf Prøysen om å 

"vere fire år i romjul`n"

passa ikkje heilt,

men den kom for meg når eg får oppleve

forventningane og gleda

fireåringen vår

viser.

Ella Victoria fylte fire år i november,

ho har alle sine juleminner frå hytta

 her me i år feirar for sjuande år på rad.

Julaftan sysla ho tolmodig med sitt mens

ho venta på julekveldens

høgdepunkt,

opninga av gåver.

Ella Victoria ser tankefullt på

haugen av pakkar.

Systrene Celina Marie 14 år og Leah Sofie 9 år

har ansvar for lesing av lappar og 

utdeling.

Det vart julesnø og aktivitetar ute andre juledag.

Aketur med mamma er 

kjempekjekt.

Ella Victoria fekk mykje fint i julegåve,

deriblant mange leiker som

ho kosar seg med.

I år utveksla dei to sønene våre med familie og

oss besteforeldra mange

alternative gåver.

Det vart sendt pengegåver til 

AMNESTY og UNICEF

til ulike formål,

 og lagt vekt på at borna vart innvia i

kor viktig det er å 

hjelpe andre som ikkje har det så godt som oss.

Eg ynskjer alle framleis god jul og romjulsdagar.

Her har me sikra møblar o.a.

for å møte "Urd" som er på veg.

Strikka julekuler

Når jula kjem er det fint å pynte 

både ute og inne.

Dei fine strikka

julekulene eg har fått

av slekt og venner

blir hengt opp i glaset

Eg er så glad i dei flotte julekulene.
Dei er kanskje strikka etter 
oppskrifter av Arne og Carlos.


Eg ynskjer alle ei god og fredeleg jul !

Juleklokkestrengen

 Mor mi broderte klokkestrengen for

 mange år sidan.

Julebodskapen

Julerose med grønt

Juleklokkestrengen kan gi kjensle av jul innandørs
for utandørs får ein det slett ikkje..

I dag 19 desember gjekk eg førmiddagsturen min i
 14 grader.
Det var nesten så eg kasta jakka.